Tori say everything don dey set to host the second edition of the Confederation of Africa Volleyball (CAVB) Zone 3 male and female clubs championships wey dem don put down say go hold for Lagos between 14th and 19th April 2019.
Dem say na Twenty-two male and female clubs from six countries go follow participate for the tournament wey the host wey be Naija go present the highest numbers of clubs.
The list of clubs wey don register show say the Benin Republic go present two male clubs, Finances, Entente and Entente for the female category. Burkina Faso get Sonapost for male and As Douanes for the female categories.
Ghana sef no carry last as dem go present their best clubs, Ghana police for the two categories while Niger get Gendarmerie and Police for the two categories.
Togo register two male clubs wey be AS OTR and Etoile Filante while the female club na AS OTR.
The host, Naija go present the highest number of clubs for both the male and female categories. Naija go present Nigeria Immigration, Nigeria Customs, Nigeria Civil Defence and Kano Pillars for the male category while Nigeria Customs, Nigeria Immigration, Nigeria Civil Defence, Kada Emeralds and Benue Queens go show for the female category.
Presido of the Nigeria Volleyball Federation wey be Engineer Musa Nimrod tok say dem don conclude all the arrangements to take make sure say everything wey concern hosting of big tournament like this one go well as dem no want wetin happen before to repeat.
Gist say the organizing and technical committee pipu of the federation don already inspect facilities and other tins for the University of Lagos.
Dem dey expect the clubs to begin enter obodo Nigeria from the 13th of April,2019.